Universala Kongreso

• Jérémie Sabyumva

Karaj partoprenantoj en la unua UK en Afriko, karaj geamikoj,

Kun granda plezuro mi bonvenigas vin hodiaŭ al ĉi tiu historia Universala Kongreso de Esperanto, la unua UK en Afriko! Ĉi tio estas grava momento por ni ĉiuj, esperantistoj kaj geamikoj de
Esperanto kaj de ĝiaj idealoj de komunikado, paco kaj unueco tra la mondo.

Esperanto, kreita de d-ro L. L Zamenhof por transcendi lingvajn barojn, ofertas al ni la ŝancon kunveni ĉi tie, sendepende de niaj originoj kaj kulturoj. Ni venas el diversaj landoj, kun diversaj lingvoj kaj tradicioj, sed ni ĉiuj kunhavas komunan revon: tiun de mondo, kie regas interkompreniĝo kaj kie ĉiu povas esprimi siajn pensojn kaj sentojn sen malhelpo.

Dum ĉi tiu kongreso, ni havos la ŝancon interŝanĝi niajn ideojn, partopreni en riĉigaj laborrenkontiĝoj kaj ĉeesti inspirajn konferencojn, prelegojn. Kune ni esploros la multajn aspektojn de Esperanto: ĝiajn kulturon kaj historion, kaj la eblojn per ĝi kreskigi interkulturan dialogon.

• Maximilian Iranghe
Urbestro de Aruŝo

Estimataj gekongresanoj, karaj esperantistoj!
Karibu Arusha, bonvenon al Aruŝo.
Por la urbestro de Aruŝo kaj por nia urbo estas honoro akcepti unuafoje en Afriko kaj en Tanzanio la Universalan Kongreson de Esperanto. Rimarkinda renkontiĝo, kiu ne nur kunigas personojn de diversaj horizontoj, sed ankaŭ festas la idealojn de paco, amikeco kaj reciproka interkompreniĝo.
La emo de la Esperanto-movado kontribui al mondo pli sana kaj pli varia, estas subtenenda. Tanzanio estas grundo, kie ĝermas ĉiuj faligitaj bonaj semoj. Nia lando estas ideala loko por diskuti la temon “Homo, lingvo kaj medio por pli bona mondo” kaj esplori la profundajn ligojn inter nia interagado kun nia natura medio kaj nia kapablo komuniki kaj kunlabori kiel homoj.
Profitu ĉi tiujn tagojn de interŝanĝoj, debatoj kaj renkontiĝoj por plifortigi la ligojn, kiuj kunigas nin preter vortoj. Kune, ni povas konstrui estontecon, kie ĉiu voĉo estos aŭdata, kie ĉiu kulturo estos respektata kaj kie ĉiu individuo povos esprimi sin libere, en la lingvo de sia elekto.

• D-ro Hassan Abbasi
Konstanta Sekretario de la Ministerio pri Turismo

Bonvenon al Tanzanio!

Mi bonvenigas vin al Tanzanio, kaj bonvenigas vin al nia bela urbo Aruŝo.
Estas granda honoro bonvenigi vin ĉi tie en la urbo Aruŝo, kie kunvivas diverslingvaj kaj diverskulturaj homoj de diversdevenaj landoj.
Por Tanzanio estas honoro akcepti vin, kaj gastigi tiun ĉi eventon, kiu estas ne nur okazo por profundigo, studado kaj interŝanĝo de konoj, sed ankaŭ por renkontiĝo, festado, dialogoj kaj turisme-rilataj programeroj.
La fenomeno Esperanto instigas min reliefigi la rolon de via organizo, celantan al la kreado de pontoj inter multaj kulturoj kaj al pli harmonia komunikado inter popoloj. Kreita en 1887 de Ludoviko L. Zamenhof, Esperanto estas unu­iga kaj inkluziva lingvo. Ĝi travivis du mondmilitojn, aldone al persekutaj epizodoj celintaj Esperantistojn, kaj daŭre estas parolata pli ol 130 jarojn poste. Temas pri impresa rezistemo kaj pri nemalpravigebla pruvo, ke unuiĝo kaj amo inter popoloj estigas forton.

• Margaret Zaleski-Zamenhof

Karaj kaj estimataj kongresanoj, gastigantoj, geamikoj, organizantoj, kiel ano de la familio Zamenhof mi fiere salutas vin kaj deziras al ĉiuj riĉan kaj sukcesan kunestadon.

Bedaŭrinde, ĉi-jare, ne eblas por mi fizike ĉeesti nian renkontiĝon. Tamen, mense mi estas kun vi, tial mi ĝoje sendas ĉi tiun mesaĝon.

Dank’ al modernaj rimedoj, hodiaŭ eblas esti kune malgraŭ la grandegaj distancoj, malgraŭ diferencoj en horzonoj. Mirinde estas observi sciencfikciajn revojn realiĝi. Ni, homaranoj, kapablas atingi niajn revojn, eĉ kiam ili ŝajnas tute fantaziaj.

Kion ni bezonas, por atingi niajn plej eksterordinarajn revojn?

Ni bezonas celon, ni bezonas grandegan deziron sukcesi. Ni bezonas, ke nia celo estu la plej grava afero en nia vivo. Ni bezonas koncentriĝi kaj uzi nian plenan energion por ke la revo fariĝu realo.

• Mireille Grosjean

Saluton al ĉiuj!

Mi ne membras en la Estraro de ILEI. Mi estis prezidanto de ILEI dum ok jaroj. Nun ne plu. Mi ĝojas anonci al vi nun, ke estas nova kapabla Estrarano de ILEI el Afriko, Patrick Manirakiza sekciestro de Burundo kaj kunordi-ganto de la Afrika Komisiono de UEA, kiu zorgos precipe pri Afrika Agado. Sed la Estraro de ILEI daŭre petis, ke mi reprezentu la Ligon ĉi tie por substreki la kontinuecon de la Agado de ILEI por Afriko tra la jaroj.

Nelson Mandela diris: ’’La plej potenca armilo por ŝanĝi la mondon estas EDUKADO’’.

Afrika Unio deklaris la jaron 2024 JARO DE EDUKADO. La unua tanzania prezidento Julius Kambarage Nyerere tre atenteme zorgis pri la enhavo de la instruprogramoj en la lernejoj. Li subtenis la lokajn lingvojn, abunde disvastigis la uzon de la svahila lingvo. Li organizis, ke infanoj en la lernejoj malkovru novajn agrikulturajn metodojn, kaj tiuj infanoj alportis tiujn novajn farmanierojn al siaj familioj. Tiel agrikulturo bone evoluis. Li provis kunmeti disajn vilaĝojn por konstrui en ĉiu el ili lernejon kaj sanservon. Li estis la unua ŝtatestro, kiu aperis en Unuiĝintaj Nacioj surhavante afrikstilajn vestaĵojn. Li estis fiera afrikano, saĝa kaj efika. La nuna mondo bezonas tiajn ŝtatestrojn.

• Duncan Charters

4-an de julio, 2024

Asubuhi Njema! Karibu! Good morning and welcome! Bonjour, tout le monde!
Bonan matenon kaj elkoran bonvenon al la 109-a Universala Kongreso de Esperanto kun nia ĉeftemo: Lingvo, homo kaj medio por pli bona mondo.

Estimataj distingitaj gastoj, karaj gekongresanoj:

Antaŭ jardekoj, por-Esperanta ĉampiono Tibor Sekelj alvokis por Kongreso de Universala Esperanto-Asocio en la Afrika kontinento. Antaŭaj Estraroj de UEA priparolis, promesis, deziris sekvi la iniciatojn de ILEI kaj TEJO, instruistoj kaj gejunuloj, kiam ili unuafoje kongresis en la kontinento. Sed fine jen ni estas en Aruŝo, en nature bela Tanzanio, kun mondfamaj okazoj por vizitoj al muzeoj de lokaj kulturaj atingoj, sopirate inspiraj montoj kiel Kilimanĝaro, respektoplena observado kaj konservado de bestoj vivantaj en ilia natura ĉirkaŭaĵo: ĝuanta Kongreson en vere digna internacia kongresejo.

Kial decidis veni UEA? Ekde nia unua renkontiĝo en Bulonjo en 1905 ni neniam kongresis en via kontinento, do tiu momento devis veni. Koincide kun laŭdinda pliaktiviĝo de Afrika agado, kaj estraraniĝo de burundano Jérémie Sabiyumva, eblis ne nur pripensi sed aktive progresi al la celo okazigi la unuan afrikan UK-on.

• Liba Gabalda

Torino estas pli ol dumiljaraĝa urbo situanta en la nordokcidenta parto de Italio. En ĝi troviĝas multnomraj muzeoj, galerioj, palacoj, placoj, kasteloj, parkoj, diverstipaj monumentoj, preĝejoj kaj aliaj religiaj konstruaĵoj. Tie, en la kapelo Sindone troviĝas ankaŭ la fama Mortotuko. La plej karakteriza monuento estas nepretervidebla turo kun bela kupolo. Temas pri la 167,5 metrojn alta La Mole Antonelliana. En ĝi estas instalita muzeo pri film-historio. La urbon trafluas la granda rivero Pado kun ties tri alfluantoj. Torino estas konata pro siaj tradicioj en kuirarto: pico, vinoj, kafoj, ĉokoladoj, glaciaĵoj, specialaj dolĉaĵoj kaj ankaŭ la aŭtomobil-firmao Fiat. Ĝia simbolo estas Taŭro. En la urbo troviĝas sennombraj verdaj fontanoj kun taŭra kapo el kiu fluas trinkakvo.

• Duncan Charters

Bonan matenon, karaj Kongresanoj!

Ni sukcesis! Ni ĵus spertis semajnon kune, parolante lingvon same nia kiel nia gepatra, eĉ pli efika kaj esprimriĉa ol ĝi estis en la plej fruaj jaroj de ĝia historio. Ni traktis gravajn temojn, aparte tiun de migrado, en la adoptita urbo de rifuĝinta hungara heroo Lajos Kossuth.

Mi deziras doni al vi du raportojn, kaj tion mi faros tute koncize. La unua estas kelkaj konstatoj de la unua analizo de la rezultoj de la enketilo kiun multaj el vi vidis, plenigis, kaj submetis. Kiel mi klarigis al vi, la tuta raporto devos atendi la oktobran numeron de nia revuo Esperanto, tamen eble interesos al vi kelkaj konstatoj kaj unu-du surprizoj en la rezultoj.

Ĝis nun respondis 581 membroj de UEA, kaj 86 nemembroj, sufiĉaj por ekhavi ideon pri viaj reagoj al nia agado kaj kiel plibonigi ĝin.