Kara Claude, vi sendube estis kaj estos inter la plej elstaraj aktivuloj, kiujn povus havi Universala Esperanto-Asocio. La radikoj de viaj agadoj en TEJO portis al UEA la junecan certecon, ke ĉiam eblas revi kaj esperi kaj ke - dum oni revas kaj esperas - oni tamen povas konstante kaj fruktodone labori. En tiu ĉi dolora tago de adiaŭo ni povas nur esperi honori vian historion je nivelo, kiu respondu al la grandeco de via ekzemplo. Por generacioj via agado estas signifoplena.

Claude Nourmont (1945-2022) estis Prezidanto de TEJO (1975-1977 ), poste ĝia Honora Prezidanto. De 2004 ĝis 2013 ŝi estis Vicprezidanto de UEA kaj multe agadis pri edukado, kongresoj kaj kulturo. Longe ŝi estis komitatano de UEA. Al ŝia edzo, Brian Moon, UEA profunde kondolencas, samkiel al ĉiuj amikoj de Claude. Ili estas multaj.

"La stranga butikumo" de Francisco Javier Moleon ricevis la unuan premion en la Belartaj Konkursoj de UEA 2020.
https://youtu.be/fmrC3AijtO4

La Kleriga Lundo celas ne nur informi al kongresanoj pri diversaj temoj, sed ankaŭ doni al ili okazon praktiki kaj vivsperti pri traktataj temoj. Pro tio la programo kutime ligiĝas al atelieroj kaj metiejoj.
La diversajn aktivecojn, kiuj konsistigas la Klerigan Lundon, povas gvidi ĉiuj homoj el la Esperanto-komunumo pretaj dividi spertojn kaj sciojn.
Se vi interesiĝas kaj volas ion proponi, skribu al la komisiito de UEA pri la Kleriga Lundo, Claude Nourmont, per moonmont@pt.lu.
Informiĝu pli pri la Kleriga Lundo ĉe http://eo.wikipedia.org/wiki/Kleriga_Lundo! Vi ekscios la ĉefajn trajtojn kaj referencojn de jam tradicia programero kaj povas helpi pripensi vian proponon.
Eksciu pli pri la ĉi-jara UK kaj aliĝu ĉe http://uea.org/kongresoj (kun rabato ĝis la 31-a de marto).

Abonantoj jam povas elŝuti la martan numeron de la revuo "Esperanto". La papera versio baldaŭ estos dissendita: https://uea.org/revuoj
La enhavlisto de la marta numero:
51 | Esperanta Radio 100-jara
54 | Faka agado: Nuntempa Esperanta radiofonio
56 | Laste Aperis

Fine de januaro 2022, eksprezidanto de UEA kaj profesoro pri edukado d-ro Mark Fettes akceptis reĝisori la kongresan temon de la 107-a Universala Kongreso en Montrealo. Mem kanadano, Fettes esploras kaj verkas pri lingvopolitikaj kaj edukaj aspektoj de indiĝenaj lingvoj jam de tridek jaroj. Li posedas ankaŭ sperton kiel kongrestema reĝisoro: en Tampereo, Finnlando, en 1995 li gvidis la kongresajn diskutojn pri la 50-jariĝo de Unuiĝintaj Nacioj (UN).

La temon de Montrealo inspiris la decido de UN plukonstrui sur la spertoj de 2019, la Internacia Jaro de Indiĝenaj Lingvoj, per dekjara komuna strebado. Per la temformulo “Lingvo, vivo, tero: Jardeko de Indiĝenaj Lingvoj” UEA inaŭguras sian propan kontribuon al la Jardeko (2022-2032). Unuflanke, temas pri grava aspekto de la lingvaj rajtoj: simile kiel esperantistoj kontraŭas la altrudon de la lingvoj de pli grandaj aŭ fortaj popoloj al aliaj malpli fortaj, ili ankaŭ emas subteni la strebojn de diversaj popoloj por revalorigi kaj plu disvolvi siajn proprajn lingvojn. Sed ekzistas ankaŭ dua, grava flanko de la temo: la kontribuo de indiĝenaj lingvoj al nia kompreno pri daŭripova evoluigo kaj la repaciĝo de homaj rilatoj kun la Tero.

Per la uzo de la internacia lingvo Esperanto oni respektas la lingvan kaj kulturan diversecon de ĉiu homo

Unuiĝintaj Nacioj festas tiun tagon ĉiujare. Ĝi okazos en la 21-a de februaro. Esperantistoj jam multe eluzas la eblon. Restas semajno por pretigi tion: UEA pretigis okulfrapan afiŝon. Jen kelkaj sugestoj:

• Vidigi la afiŝon en viaj retejoj.
• Organizi publikajn kunsidojn kun la temo.
• Kunlabori kun la Asocio de Unuiĝintaj Nacioj en via lando, se ekzistas.
• Kunlabori kun aktivulaj grupoj defendante lingvajn rajtojn por negrandaj lingvoj.

Suso Moinhos recitas sian poemon "Lingvo" por la "Galerio de gepoetoj".