La 9-a Eŭropa Festivalo de Esperantaj Kanto, aŭspiciita de UEA, kulminis per Koncerto de Premiitoj, la 12-an de septembro 2021.
(https://eventaservo.org/e/EFEKantoj2021)
Legu la rezultojn (https://revuoesperanto.org/9_kanta_festivalo), ankaŭ aperintajn en la novembra numero de revuo Esperanto.

Ricevinte kelkajn petojn, ni publikigas la tekstojn de kantoj, kiuj ne aperis en la filmo de la Koncerto de Premiitoj
https://www.youtube.com/watch?v=Eqru6imwOJc
Ĝuu - aŭ reĝuu - la spektadon.

Honora patronado

Universala Esperanto-Asocio, Prezi­dan­to de Vroclavo – Jacek Sutryk, EUROKKA, Internacia Ligo de Esperantistaj Instruistoj, la Prezidanto de la Ko­misiono pri Edukado kaj Junularo – Bohdan Aniszczyk, Malsuprasilezia Federacio de Neregistaraj Organizaĵoj.

Amaskomunikila patronado

Juna amiko, Interreta Radio KSON, Interreta Radio Varsovia Vento.

Kategorioj

1. Solisto, 2. Koruso aŭ ensemblo, 3. En­-
studia registraĵo.
La aĝkategorioj: 1. 0-18 jaroj, 2. 19-54 jaroj, 3. 55-111 jaroj.

Ĵurio

La ĵurio – aro da internaciaj specialistoj (esperantistoj kaj muzikistoj) – pritaksis ĉefe la lingvan kaj muzikan ĝustecon. En kelkaj kategorioj la ĵurio decidis ne aljuĝi la unuan aŭ eĉ la trian premion, se la kvalito de la kantoj lingve aŭ muzike ne atingis la akcepteblan minimumon.

Ĵurianoj

Jean-Marc Leclercq (Francio), Anna Os­makowicz (Pollando), James Piton (Bra­zilo), Paulo Sérgio Viana (Brazilo), Nan­­ne Kalma (Nederlando), Małgosia Komarnicka (Pollando).

En 2022 okazos elekto de novaj gvidorganoj de UEA por la periodo 2022-2025. Parto de ĝi estos elekto de komitatanoj B por reprezenti la individuajn membrojn (IM) en la Komitato de UEA. Laŭ la Statuto (art.24, https://uea.org/teko/regularoj/statuto#aF) oni elektas unu komitatanon B por ĉiu komencita milo da IM. Laŭ la antaŭvidata nombro de IM oni elektos kvin komitatanojn B.

La Ĝenerala Regularo (art. 8, https://uea.org/teko/regularoj/ghenerala_regularo#a8) difinas: “Dek individuaj membroj el minimume tri diversaj regnoj rajtas proponi unu solan kandidaton el inter la individuaj membroj. Al la proponoj, subskribitaj de la proponintoj, devas esti aldonitaj, krom la skriba konsento de la kandidato, ankaŭ biografieto kaj deklaro pri la movadaj celoj de la kandidato, kiuj kune ampleksu maksimume 150 vortojn.”

Kompletaj proponoj atingu la Centran Oficejon de UEA (Nieuwe Binnenweg 176, 3015 BJ Rotterdam, Nederlando) ĝis la 31-a de januaro 2022. Proponoj devas esti subskribitaj, do eblas uzi poŝton, fakson: +49 30 364 280 169 aŭ sendo de elektronike subskribita dokumento al la retpoŝtadreso: bkomitatanoj2022@co.uea.org

Por faciligi la kolekton de subtensubskriboj vi trovas formularon ĉe https://uea.org/l/teko/komitataj/Kandidatigilo_Komitatanoj_B_2022_2025.pdf

La uzo de formularo ne estas deviga. Eblas subteni per iu ajn subskribita dokumento.

Ĉiu kandidato devas esti IM de UEA dum la du antaŭaj jaroj (t.e. 2020 kaj 2021) kaj, se elektita, resti IM tra la tuta oficperiodo. Salajrata oficisto de UEA ne rajtas esti komitatano. Komitatano, kiu persone ĉeestis neniun komitatkunsidon en la periodo 2016-2021, ne estas reelektebla.

Se ne estos pli ol kvin kandidatoj, ili ĉiuj estos elektitaj sen voĉdonado. Se la nombro estos pli granda, la individuaj membroj elektos kvin komitatanojn B per reta / poŝta balotado.

El la Gazetaraj Komunikoj

• Miguel Fernández, Prezidanto de la Belartaj Konkursoj

La Belartaj Konkursoj de UEA (BK) havas regularon, kies bazaj principoj, krom tio, ke ili laŭiĝas al la protokoloj kaj normoj ĝenerale sekvataj de ĉi-specaj konkursoj ie ajn en la mondo, estas de ni diskonigataj kadre de niaj ĉiujaraj alvokoj al partopreno. En ĉi tiuj, krome, la BK-Sekretario ĉiam aldonas jenon: “detala regularo troviĝas en la retejo de UEA”:
https://uea.org/teko/regularoj/belartaj_konkursoj
Konvenas do, ke antaŭ ol konkursi BK-konkursantoj tralegu tiun regularon por agi laŭe al ĝi.
La artikolo 2.3 de tiu regularo tekstas jene:
Nevalidaj por la Konkursoj estas verkoj aperintaj en presa aŭ en alia formo, inkluzive de publika legado, radia, televida, reta aŭ bita dissendoj ks. Ĉiu konkursanto konsentas, ke la rajto pri unua aperigo de premiita verko apartenas al UEA, kaj devigas sin ne publikigi ĝin aliloke, krom se UEA rifuzas la aperigon. La kopirajto restas ĉe la aŭtoro, kiu tamen konsentas cedi ĝin senpage en okazo de eldono de almanako aŭ antologio de la Belartaj Konkursoj, kondiĉe ke tiu aperu kun la aprobo de UEA.

Kajto kantis "Bela rev" en la BK-Festo (Ceremonio de Disdono de Premioj de la Belartaj Konkursoj de UEA).
La teksto de Ewa Grochowska ricevis Honoran Mencion en la branĉo "Kantoteksto" de la Belartaj Konkursoj de UEA-2021. Nanne Kalma komponis la muzikon.

Abonantoj jam povas elŝuti la novembran numeron de la revuo "Esperanto". La papera versio baldaŭ estos dissendita: https://uea.org/revuoj

La enhavlisto de la novembra numero:
219 | Esperantista lingvisto en Barato ricevas ŝtatan premion
220 | ILEI: Premio Maŭro La Torre
220 | AMO: AMO ĉiam rigardas antaŭen

La 24-an de oktobro 2021, ni festas 76 jarojn de Unuiĝintaj Nacioj, la plej ampleksa internacia organizo, la plej ambicia elpaŝo por internacia diplomatio kaj nuntempe la plej grava institucio por trovi kaj antaŭenigi tutmondajn solvojn por tutmondaj problemoj.

La nuntempaj defioj, ekde klimatŝanĝiĝo ĝis genra malegaleco, ekde malpaco ĝis malsato, ekde deviga migrado ĝis maljusta diskriminacio, ekde KOVIM-19 ĝis malsanaj vivkondiĉoj, ekde misinformado ĝis malriĉeco, montras, ke la mondo bezonas multe pli da multflankismo kaj kunlaborado. Kaj por tio ni devas konstrui la UN-on kiun la popoloj de la mondo bezonas.