Ĵaŭdo, Julio 1, 2021 - 18:58

Antaŭ 100 jaroj (la 4-an de julio) mortis Antoni Grabowski (n. 1857). Okaze de la centjariĝo de lia morto, dum la tuta julio la libroservo de UEA ofertas lian epokfaran tradukon Sinjoro Tadeo kun sesona rabato sendepende de kvanto:
https://katalogo.uea.org/?inf=2956

Merkredo, Junio 30, 2021 - 21:33


La Redakcio
Aperis la tria numero de La Kolombo de Paco. Legu, ĝuu, libere kaj aktive diskonigu ĝin al viaj amikoj en Esperantujo!

Elŝutu senpage

Mardo, Junio 29, 2021 - 23:06


UEA kaj la Komisiono de UEA por Eŭropa agado petas vian helpon:

Helpu nin kolekti 3500€ por realigi Esperantan agadon fine de julio 2021, dum la junulara festivalo Polandrock. Tiu sumo reprezentas la minimuman kvanton por mendi la tendojn kun mebloj en prestiĝa loko de la festivalo. Jam la kvaran jaron UEA subtenas la agadon. Al ĉiu 1 € donacotaj, UEA aldonos 1 € el propra buĝeto, tiel ke organizantoj ricevos entute la sumon de 3500€, almenaŭ.

Ekde 2017 Universala Esperanto-Asocio subtenas, alvokas mondonacojn kaj helpas financi la projekton de Multkultura Vilaĝo Esperanto. Vi povas sendi vian donacon al UEA konto "Informado" (http://uea.org/alighoj/donacoj/informado), aldonante kiel komenton: "por Polandrock". Alternative eblas donaci per jena Paypal-ligilo.

Lundo, Junio 28, 2021 - 22:51

La retkurson "#forlaflatado: lernu prelegi en 10 simplaj paŝoj" eblas nun sekvi senpage laŭ oferto de UEA al la Esperanto-komunumo. La kurson preparis Leandro Abrahão, ano de la Komisiono de UEA por la Oratora Konkurso. Ĝia disponigo al la Esperanto-komunumo estas strategie al UEA cele al kapabligo de esperantistoj, pro kio la Estraro de UEA decidis aŭspicii ĝin. Parolarto estas aparte proksima de la lingva afero kaj estas studkampo speciale ligita al la historio de la Asocio, ĉar pri ĝi okupiĝis ekzemple prezidantoj de UEA kiel Ivo Lapenna, Humphrey Tonkin kaj Duncan Charters.

Dimanĉo, Junio 27, 2021 - 23:32

Abonantoj jam povas elŝuti lajulia-aŭgustan numeron de la revuo "Esperanto". La papera versio baldaŭ estos dissendita: https://uea.org/revuoj

La enhavlisto de la julia-aŭgusta numero:
147 | Malferme: La Lingvo kiel Promeso de Renkonto. Parolado de Marco Lucchesi
150 | Progreso plurkampa pluiras persiste
151 | ILEI-simpozio, Esperanto en universitataj medioj
151 | Pri la 54-a ILEI-Kongreso en 2021. 7 – 14 aŭgusto
152 | Afriko: Kio okazas en Tanzanio pri Esperanto-movado?

Sabato, Junio 26, 2021 - 21:20

De 1996 la Nitobe-Simpozioj kunvenigas diversajn spertulojn kaj aliajn koncernatojn, por ke ili priparolu aktualaĵojn de lingvopolitiko en internaciaj kuntekstoj. La serion oni nomis laŭ la japana internaciisto kaj diplomato Nitobe Inazō, kiu oficis kiel ĝenerala vicsekretario frue en la historio de la Ligo de Nacioj, kiam ĝi komencis studi lingvopolitikon eksplicite kaj je la internacia nivelo.

La Simpoziojn organizas la Centro de Esploro kaj Dokumentado pri la Monda Lingvo-Problemo kunlabore kun diversaj lokaj partneroj kaj subvenciate de Esperantic Studies Foundation. Ĉi-jare ni ĝojas pro nia partnereco kun la Fako pri Aplikataj Sociaj kaj Politikaj Sciencoj ĉe la Universitato de Ulstero por esplori temon tre gravan en la kuntekstoj nord-irlanda, eŭropa kaj internacia: “Lingvoj, konfliktoj kaj sekureco”.

Vendredo, Junio 25, 2021 - 00:44

La komisiono pri Ĝemelaj Urboj de
UEA kaj Espéranto-Francel


Post la dua mondmilito naskiĝis forta kontraŭmilita sento. Popoloj de­cidis lukti kontraŭ malamo kaj ran­koroj per sociaj kaj kulturaj in­terŝan­ĝoj. Evidentiĝis en la 1950-aj jaroj, ke la plej bona rimedo por teksi fortajn internaciajn rilatojn estas labori skale de la plej baza demokrata komunumo: la urbo.
La 30-an de januaro 1956 la urboj Romo kaj Parizo ĝemeliĝis kaj decidis ekskluzivigi tiun rilaton per jena fra­zo: “Nur Parizo dignas je Romo, nur Ro­mo dignas je Parizo”. Rememorinte tiun troigeman aserton, la Roma kaj Pariza Esperanto-kluboj decidis revivigi tiun specialan rilaton en junio 2020. Dume, pluraj aliaj urboj en la mondo subskribis ami­kecan kaj partneran kontrakton kun Parizo, inter kiuj Tokio (1982), Tel-Avi­vo (1985), Berlino (1987), Madrido (2000) kaj Dakaro (2011).
Unuavice ni organizis ĉiumona­tan retan babilrondon kies temoj estis di­versaj: vojaĝoj, kuirarto, hejmbestoj ktp. En majo 2021 okazos la 10-a ba­bilrondo. Pri la dato kaj ligilo eblos informiĝi per Eventa Servo.

Ĵaŭdo, Junio 24, 2021 - 20:29

Sendita al EKOSOK, al la Departamento de UN pri Tutmonda Komunikado (UNDGC) kaj al la Konferenco de Neregistaraj Organizoj (CoNGO).
Universala Esperanto-Asocio (UEA) salutas Unuiĝintajn Naciojn, la Altan Komisionon de UN por Rifuĝintoj kaj speciale ĉiujn rifuĝintojn okaze de la Monda Tago de Rifuĝintoj, la 20-an de junio 2021. La tago honoras la forton kaj kuraĝon de rifuĝintoj kaj tiujn kiuj helpas ilin kaj celas publikan konscion kaj subtenon al tiuj homoj, kiuj devis fuĝi el siaj hejmoj pro konflikto, persekutado aŭ naturaj katastrofoj.

Lastatempa komuniko de Unuiĝintaj Nacioj klarigas, ke la nombro de homoj forigitaj el siaj hejmoj pro perforto, milito aŭ homrajtaj atencoj atingis 82,4 milionojn en la jaro 2020 - 4% pli ol en 2019. Inter 2018 kaj 2020, preskaŭ unu miliono da infanoj naskiĝis kiel rifuĝintoj. Laŭ la Alta Komisionestro de UN pri Rifuĝintoj, Filippo Grandi, pli ol unu procento de la tuta homaro estas perforte dislokita.

Mardo, Junio 22, 2021 - 02:27

Aktualaj kaj urĝaj projektoj estas du: rapida helpo post la erupcio de la vulkano kaj la projekto pri geonkloj.

Betti Maul

Por ĉiuj kiuj ankoraŭ ne konas la Asocion Nova Familio (ANF): Ĝi estas bonfara organizo, kiu agadas en la urbo Goma, en la Demokratia Respubliko Kongo. Ĝia celo estas prizorgi infanojn, kiuj perdis siajn gepatrojn pro la intercivitana milito en la lando. Pli detale vi povas ekkoni nin per la plurlingva paĝaro je la retpaĝo de la Germana Esperanto-Asocio https://www.esperanto.de/eo/asocio-nova-familio-eo
kaj en vizaĝlibro
https://www.facebook.com/AsocioNovaFamilio

Paĝoj