La 7-a Afrika Kongreso de UEA – altpinto de 2019
• Stefan MacGill
Jam de tridek jaroj okazas multega agado en Afriko. Tamen, afrikanoj konsistigas nur 3% de nia membraro, kaj nur 2% de nia komitato; ĝi entute ne naskis akademianon, nek gastigis Universalan Kongreson. Pli pozitive, ĝi havas 20% de niaj landaj asocioj – tio atestas la grandegan entuziasmon kaj sopiron je internacieco. Tio, kune kun mirinde alta lingvonivelo. Same rimarkeblas granda deziro ligi sian esperantistecon kun evoluigaj kaj edukaj celoj.
La jaro 2019 povos esti mejloŝtona por la afrika movado, pro du kialoj. Unue, ni enkondukas novan kotizsistemon, kiu finfine ebligos al multaj afrikanoj mem membrigi sin en UEA; ni laboregas por starigi la landajn kontaktojn por ebligi tion. Due, okazos la 7-a Afrika Kongreso de UEA en la ĉefurbo de Burundo, Buĵumburo en decembro 2019. Ĝia temo: ‘Verdigo de la kontinento Afriko’. UEA subtenis la 6-an AKE en Tanzanio en 2016 per grandaj monsumoj; pro la nuna situacio en UEA, la eblo fari ion similan ĉi-foje ne ekzistos. La sukceso de tiu grava kongreso dependos
niaflanke ege pli forte de donacoj al la Afrika Fondaĵo. Viaj donacoj povos sproni aliajn projektojn, ekzemple la realigon de kelkaj el la celoj akceptitaj dum la 6-a AKE, inter kiuj figuras la aperigo de svahillingvaj informilo kaj kurseto.
Por pli da informoj pri la 7-a AKE uzeblas la adresoj: afrikakongreso7@gmail.com aŭ jerrybs21@gmail.com kaj la retpaĝo de la Afrika Komisiono: esperanto-afriko.org.
Ni kaptu la okazon levi la afrikan agadon en 2019. Viaj donacoj al la Afrika Fondaĵo ege helpos nin!
Fotoj de Stefan MacGill
Tiu ĉi artikolo estis publikigita en la decembra numero 2018. PDF de la decembra numero estas senpage elŝutebla.