Elektitaj (sen baloto) 5 komitatanoj B de UEA: mandato 2025-2028. Komuniko 1216

Ĝis la 31-a de januaro individuaj membroj de UEA (IM) povis kandidatiĝi por la posteno de komitatano B de UEA, mandato 2025-2028. Komitatanoj B reprezentas la IM-ojn en la Komitato, la supera organo de la Asocio. Laŭ la Statuto de UEA (art. 24) por la koncerna mandato ĝis maksimume kvin komitatanoj B povus esti elektitaj.
Laŭ la Ĝenerala Regularo (art. 8) validaj proponoj por kandidatoj konsistas je skriba preteco, biografieto kaj deklaro pri movadaj celoj de la kandidato plus skribaj subtenoj de minimume 10 IM-oj el minimume tri diversaj regnoj. Ĝis la limdato la Centra Oficejo ricevis ok proponojn, ĉiuj retpoŝte, sed nur kvin estis plene validaj, plenumantaj ĉiujn kondiĉojn. Pro tio, ke la nombro da validaj proponoj ne superis la nombron de la elektotaj komitatanoj B, voĉdonado ne devis okazi kaj ĉiuj kandidatoj estas konsiderataj kiel elektitaj, same kiel okazis en 2022, 2016, 2007 kaj 1992.
La novaj komitatanoj B estas José Antonio del Barrio el Hispanio, Marija Belošević el Kroatio, François Lo Jacomo el Francio, Wu Guojiang el Ĉinio kaj Espoir Kasati el D.R. Kongo. La nove elektitaj komitatanoj B ekoficos je la malfermo de la ordinara kunveno de la Komitato (laŭ la art. 3 de la Elekta Regularo), dum la 110-a Universala Kongreso en Brno, Ĉeĥio.
UEA gratulas al la elektitoj kaj deziras al ili aktivan kontribuadon al la Komitato kaj la Asocio.