BET-59 en Litovio
• Gražina Opulskienė
Multaj esperantistoj certe aŭdis pri BET (Baltiaj Esperanto-Tagoj) kaj homoj kiuj interesiĝas pri aranĝoj kaj strebas praktike uzi la lingvon eble jam partoprenis en iu de multaj jam okazintaj sukcesaj BET. Tradicia aranĝo, kiu ekde 1959 okazas laŭvice en Litovio, Latvio kaj Estonio estas bonega okazo por revidi amikojn, trovi novajn, paroli Esperanton, sekvi interesajn prelegojn aŭ lerni la lingvon en kursoj. La programo de Baltiaj Esperanto-Tagoj estos varia kaj abunda. Somera Universitato prezentos interesajn prelegojn, funkcios diversnivelaj kursoj, libroservo, ĉiuvespere okazos artaj aranĝoj, koncertoj, estos organizitaj kvizoj, ekskursoj, diskutoj, tagojn finos jam kutima dum litovaj BET amika kunkantado en bona etoso. Se ankaŭ vi havas ideojn kiel eblas kontribui al la programo, ne hezitu kontakti la organizantojn: litova.ea@mail.lt.
En 2025 BET-59 okazos en Litovio, dua laŭ grandeco urbo Kaunas, inter la 5-13 de julio, kaj la partoprenantoj povos sperti ankaŭ la emocian por litovoj festotagon la 6-an de julio –Tagon de la Ŝtato – kiam samtempe ĉiuj litovoj en la mondo kantas la nacian himnon. Urbo Kaunas estas forte ligita kun Esperanto historie: Klara, la edzino de L.L.Zamenhof, devenis de tiu urbo kaj Majstro refoje gastis en la domo de la bopatroj.
BET-59 okazos en la Universitato de Vytautas la Granda, kaj krom la universitato kun Litova Esperanto Asocio kunlaboras ankaŭ la Monda Centro de Litovoj. Por la partoprenantoj eblos uzi la universitatajn salonojn, aŭditoriojn, studentajn domojn, universitatan kafejon, komputilejojn, ktp. Estos organizita ebleco por la partoprenantoj manĝi surloke.
Kaunas estas bone atingebla per aviadiloj, trajnoj kaj internaciaj busaj linioj. Litovaj esperantistoj esperas, ke BET-59 kunigos ĝis 500 partoprenantojn el 30-40 landoj. Bonvolu aliĝi jam nun: https://mallonge.net/bet59. Ĉiuj informoj pri BET-59 jam estas troveblaj en la paĝo de Litova Esperanta Asocio: http://www.esperanto.lt/. Kaj se vi havas demandojn aŭ bezonas pliajn informojn, la organizantoj volonte helpos.
Esperantistoj de tri Baltaj landoj vere strebas, ke tradicio de BET-oj restu daŭripova, BET-59 havas subtenon kaj diversflankan helpon de la urba municipo kaj ankaŭ de ŝtataj instancoj, sed sukceso ankaŭ dependas de nia esperantista komunumo. Bonvolu aliĝi kaj certigi, ke vi ne maltrafos la okazon reviziti Litovion aŭ malkovri ĝin spertante interesan semajnon kun samideanoj de diversaj landoj.