Erich-Dieter Krause, (12.04.1935 – 18.10.2023)
Erich-Dieter Krause mortis la 18-an de oktobro 2023 en Lepsiko. Konata leksikografiisto. Li verkis, interalie, ekde la 1960-aj jaroj Germana-Esperantan kaj Esperanto-Germanan vortarojn, kiujn eldonis Enzyklopädie Leipzig, Buske (Hamburgo) kaj MONDIAL (Nov-Jorko). Nur en 2023 aperis lia Vollständiges Wörterbuch Deutsch-Esperanto in drei Bänden (Plena vortaro Germana-Esperanto en tri volumoj; 2511 paĝoj). Specialisto pri la indonezia lingvo (Bahasa Indonesia), ĝis sia emeritiĝo en la jaro 2000 li laboris en la Orientazia Instituto de la Universitato de Lepsiko. Li publikigis vortarojn kaj lernolibrojn pri la indonezia lingvo, prelegis en pluraj internaciaj konferencoj pri problemoj de leksikografio de Esperanto kaj de la indonezia kaj publikigis artikolojn pri la influo de aziaj lingvoj al Esperanto. Longtempa membro de UEA, de la Akademio de Esperanto kaj de la redakta komitato de la fakrevuo Esperantologio / Esperanto Studies, li ankoraŭ partoprenis baloton en la Akademio unu monaton antaŭ sia morto. Okaze de lia 80-jariĝo, Detlev Blanke publikigis bibliografion de liaj verkoj en Informilo por Interlingvistoj 92-93 (1-2 2015).
Estis publikigita en la decembra numero 2023
